У выпадку вонкавай пагрозы, у тым ліку з боку Расіі, Еўрасаюз зможа абараняцца без падтрымкі ЗША не больш за некалькі тыдняў, расказалі Bloomberg крыніцы ў абароннай сферы.
Нягледзячы на запэўніванні ў трансатлантычным партнёрстве, краіны NATO ўсведамляюць сваю залежнасць ад ЗША. Паводле ацэнак абаронных экспертаў, без амерыканскай падтрымкі еўрапейскія ўзброеныя сілы змогуць стрымліваць расійскі наступ толькі некалькі тыдняў. Хоць поўны выхад ЗША з NATO малаімаверны, нават скарачэнне амерыканскай вайсковай прысутнасці ў Еўропе можа сур’ёзна паўплываць на баланс сіл.
Эксперты падкрэсліваюць, што без ЗША Еўропе спатрэбіцца не менш за пяць гадоў для замяшчэння амерыканскай вайсковай падтрымкі, уключаючы лагістыку, разведку і пастаўкі ўзбраенняў. Вытворчыя магутнасці кантынента, уключаючы асноўныя кампаненты, такія як порах, усё яшчэ недастатковыя. У выпадку вайны боепрыпасы могуць скончыцца за некалькіх дзён.
Нагадаем, 4 сакавіка кіраўніца Еўракамісіі (ЕК) Урсула фон дэр Ляен прадставіла лідарам ЕС план па пераўзбраенні на 800 млрд еўра. Учора, 6 сакавіка, у Брусэлі на экстранным саміце гэты план узгаднілі.